Hormatly Prezidentimiziň baştutanlygynda berkarar döwletimiziň mundan beýläk-de ösmegi üçin ygtybarly binýat döredilip, ýurdumyzyň durmuş ulgamy yzygiderli özgerýär. Raýatlaryň ýaşaýyş-durmuş derejesini has-da ýokarlandyrmak, durmuş goraglylygyny we iş üpjünçilik ulgamyny kämilleşdirmek maksady bilen, şu ýylyň 17-27-nji dekabry aralygynda «Ilat ýazuwy – 2022: Jebislik, Bagtyýarlyk, Röwşen geljek!» şygary bilen ýurdumyzda ilatyň we ýaşaýyş jaý gorunyň uçdantutma ýazuwy geçiriler.
Dekabr aýynda geçiriljek ilatyň we ýaşaýyş jaý gorunyň uçdantutma ýazuwynyň baş maksady ilatyň demografik düzümi hem-de ýurdumyzda raýatlaryň durmuş-ykdysady ýagdaýy baradaky anyk maglumatlary almakdan ybarat bolup, şol bir wagtyň özünde, meýilleşdirilýän bu möhüm çäre Birleşen Milletler Guramasynyň Ykdysady we Durmuş Geňeşiniň 2015-nji ýylda kabul edilen Kararynyň maksatlaryna laýyk gelýär. Bu bolsa ýurdumyz bilen BMG-niň arasynda strategik hyzmatdaşlygyň yzygiderli ösdürilýändiginiň ýene bir aýdyň subutnamasydyr.